Máis de 500 persoas de oito comunidades autónomas participaron no sorteo do VIII Outono gastronómico nas redes sociais de Turismo de Galicia

sorteo do VIII Outono gastronómico nas redes sociais de Turismo de Galicia

 

O sorteo de seis Fins de Semana Outono Gastronómico en Turismo Rural de Galicia convocado por Turismo de Galicia na rede social Facebook para promocionar ao longo dos meses de outubro e novembro a oitava edición desta iniciativa, recibiu a participación de 522 persoas de oito comunidades autónomas españolas.

Así, neste sorteo, déronse cita participantes de Andalucía, Asturias, Cantabria, Castela e León, Cataluña, Galicia, Madrid e a Comunidade Valenciana que competiron polos seis premios para dúas persoas postos a disposición dos concursantes de xeito gratuíto por Turismo de Galicia.

O prazo para participar no sorteo rematou esta semana, logo de que os participantes tiveran máis de mes e medio para contestar tres preguntas relacionadas co outono en Galicia e inscribirse no sorteo.

Gañadores

Unha vez rematado o prazo, Turismo de Galicia realizou un sorteo aleatorio no que participaron os 497 acertantes das preguntas formuladas no concurso, resultando gañadores seis persoas residentes en Galicia, concretamente na Coruña –dous agraciados- Maside, Narón, Oleiros e Vigo.

Os gañadores teñen de prazo ata o día 14 de decembro para gozar dos premios que inclúen catro menús outono gastronómico, o aloxamento do venres e o sábado para dúas persoas, así como os almorzos do sábado e o domingo.