Denunciado en Vigo por maltratar un cachorro porque lle estragou un billete
Axentes da Policía Local de Vigo denunciaron un home, J.M.M., de 45 anos, que supostamente maltratou un cachorro de can porque este, segundo dixo, lle estragara un billete de 50 euros, informaron fontes policiais.
Unha muller solicitou onte sobre as 14.50 horas a presenza da Policía no canellón da Pomba ao escoitar desde o seu domicilio como alguén berraba e golpeaba un can, cuxos queixumes puido ouvir procedentes dunha casa ocupada.
Os axentes entrevistáronse cun home no inmoble en que supostamente se producira a agresión e este recoñeceulles que golpeara o cachorro polo motivo aludido.
Despois de escoitar a súa versión, comprobaron que o cachorro, de raza mestiza e apenas uns meses de vida, estaba mollado, moi sucio e tremente, apenas se podía manter de pé e en varias ocasións vomitou sangue.
Ao ser preguntado polas razóns do estado do animal, J.M.M. non soubo dar unha explicación, polo que os axentes avisaron a protectora de animais para que se fixesen cargo do cachorro e denunciaron os feitos ante a autoridade xudicial.
