“CORRENDO ENTRE VIÑEDOS”, 1ª Carreira Popular na 52ª edición da Feira do Viño do Ribeiro

2015 Cartel CP Ribadavia  

“CORRENDO ENTRE VIÑEDOS”, 1ª Carreira Popular na 52ª edición da Feira do Viño do Ribeiro

A Feira do Viño do Ribeiro, que este ano alcanza a súa 52ª edición, terá lugar os vindeiros días 1, 2 e 3 de maio de 2015, no recinto da Alameda, en Ribadavia (Ourense), ven de presentar unha das súas principais novidades, no que se refire ao apartado de actividades relacionadas co mundo e a cultura do viño.

A 1ª Carreira Popular Feira do Viño do Ribeiro “Correndo entre viñedos”, levarase a cabo o domingo día 3 de maio, en horario matutino, e foi presentada esta mañá por Marcos Blanco Jorge, Alcalde do Concello de Ribadavia; Miguel Ángel Viso Diéguez, Presidente do Consello Regulador da Denominación de Orixe Ribeiro; José Prieto Pérez, Concelleiro de Cultura, Turismo, Educación e Deporte do Concello de Ribadavia; e Eladio Gómez Rosales, Presidente do Club Deportivo Aurum, nun acto no que se indicou o percorrido da mesma, de 9 Km, que discorrerá por unha fermosa mestura de paisaxes con natureza, viñedos, ríos (Avia e Miño) e polo patrimonio histórico e cultural do barrio xudeu de Ribadavia.

foto+cp+FVR+2015  

O Alcalde de Ribadavia, Marcos Blanco, destacou a importancia desta actividade, dentro do contexto da Feira do Viño do Ribeiro, é o de ligar a vida san, o deporte e un alimento tan interesante e complementario na alimentación e dieta atlántica, como é viño, sempre que sexa consumido con moderación.

Pola súa parte, Miguel Ángel Viso, presidente do CRDO Ribeiro, facía mención na importancia de seguir levando a cabo accións que fomenten, dun xeito san e razoable, o consumo de viño cada vez máis entre a poboación máis nova.

Finalmente, Eladio Gómez, do Club Aurum, sinalaba a oportunidade que se brinda con esta actividade para que toda a familia, dende os máis cativos ata os máis maiores, participe de forma conxunta e podan gozar da Feira do Viño do Ribeiro, posto que haberá diferentes categorías e modalidades (con premios para todas elas) que fará posible a implicación de todo o mundo.