Sinsal ofrecerá 26 concertos, a maioría de grupos inéditos en Galicia
O Festival Sinsal Son Estrella Galicia, que se organizará do 25 ao 27 de xullo na Illa de San Simón, ofrecerá un total de 26 concertos de bandas e artistas internacionais, a maior parte deles inéditos en Galicia, que se acompañarán de diferentes actividades paralelas para todos os públicos.
Durante a presentación do evento esta mañá, o director da Axencia Galega das Industrias Culturais (Agadic), Jacobo Sutil, destacou o «éxito» da «fórmula rompedora a todos os niveis» que distingue o devandito certame, e que se basea en manter en «estrito segredo» o cartel de actuacións ata o día da súa celebración.
Polo momento, só transcenderon os nomes dos grupos que actuarán durante a primeira xornada: Throwing Shade, Frikstailers, Jagwa Music, Oso Leone e Xenia Rubinos, e mantense a expectación cos concertos do sábado, día para o que as entradas están xa esgotadas, e o domingo, ambas as dúas xornadas co mesmo cartel descoñecido polo momento.
Sutil, que estivo acompañado polo alcalde de Redondela, Javier Bas; Laura Piñeiro, de Estrella Galicia, e o codirector do festival, Julio Gómez, incidiu na «liña de crecemento progresivo» que mantén o evento desde a súa creación e que confirma que a «diferenciación e a profesionalidade son claves para o éxito de calquera iniciativa».
Sinsal oferta para os asistentes transporte marítimo desde os portos de San Adrián e Vigo con prezos que oscilan entre os 25 e os 40 euros para os adultos e entre os 6 e os 10 euros para os nenos, dependendo do peirao de saída.
EFE