A «Festa da Istoria» como un referente cultural e etnográfico en Galicia
- A Deputación de Ourense apoia a «Festa da Istoria» como un referente cultural e etnográfico en Galicia
- Manuel Baltar confirmoulle ao presidente da coordinadora do evento, Miguel García, a colaboración do goberno provincial para seguir potenciando «unha das celebracións que pon en valor a nosa historia»
O presidente da Deputación de Ourense, Manuel Baltar, mantivo unha reunión co presidente da coordinadora da «Festa da Istoria» de Ribadavia, Miguel García, quen lle solicitou o apoio da institución provincial para este evento. Manuel Baltar amosoulle novamente o compromiso do goberno provincial «cunha das celebracións etnográficas máis importantes de Galicia, e para elo levaremos na modificación de créditos prevista para este ano 2016 o apoio para que esta festa siga a ser un referente e forme parte dese circuíto cultural da nosa provincia que pon en valor as nosas tradicións e a nosa historia», afirmou Manuel Baltar.
De feito, a «Festa da Istoria» recorda, ano tras ano, a historia da vila de Ribadavia e a súa contorna, achegando as tradicións e vivencias de épocas pasadas, nunha recreación medieval onde se representan as distintas culturas, relixións, oficios e clases sociais da época medieval. A recuperación deste evento foi un esforzo da xa desaparecida «Escola Taller de Santo Andrés», e a súa testemuña foi recollida polo pobo, que, representado por unha coordinadora veciñal, segue desenvolvendo esta actividade todos os anos, contando para iso cun gran número de voluntarios.
A «Festa da Istoria» ten acadado importantes recoñecementos de ámbito rexional, estatal e internacional, entre os que figuran a «Declaración de Interese Turístico Nacional» ou o Premio «Canle da Historia».
