PSOE denuncia desgoberno na Coruña tras cesamento director Servizos Sociais
O PSdeG-PSOE denunciou unha situación de «desgoberno» no Concello da Coruña tras o cesamento do director de Servizos Sociais, José Luis Quintela, que afrontou hai poucas semanas un xuízo por supostos insultos a activistas de Stop Desafiuzamentos e revelación de segredos dunha desafiuzada.
Ao grupo municipal socialista parécelle que «María Pita sobrevive no desgoberno que cada día xera unha nova noticia con respecto á nefasta xestión política, económica e administrativa do goberno que encabeza Negreira», segundo relata nun comunicado
Quedan só dez meses para que termine esta etapa antes das próximas eleccións municipais e os socialistas cren que a noticia do cesamento do director de Servizos Sociais é unha mala noticia.
«Demostra o pouco que lle importa a política social na cidade, cuxos resultados nos últimos anos falan de recortes e incapacidade para atender as necesidades reais dos coruñeses. Pero é que a este cesamento súmase a fervenza de despedimentos que se iniciou ao principio de mandato e que non parou nestes tres anos», engaden.
Ademais, chaman a atención acerca de que non exista xefe de Policía e tamén do feito de que pola Asesoría Xurídica xa pasaron tres directores durante a lexislatura.
«O PSOE reprochou en numerosas ocasións a Negreira a súa desconfianza cara aos funcionarios, o acoso e desprezo que sufriron moitos deles nestes tres anos de mandato e as trabas que se encontraron para exercer a súa función e incluso para desenvolver con garantías a súa carreira profesional», explican.
O grupo socialista afirma que o alcalde, Carlos Negreira, «chegou incluso a acusar funcionarios de levar para casa obras de arte e advertiu que boa parte das traballadoras sociais estiveron de baixa polo estrés ao que están sendo sometidas».
«A algún policía culpabilizárono de pór multas cando houbo queixas nalgún barrio, como o caso da Cidade Vella; e a moitos retiráronlles as competencias para contratar asesorías e consultorías externas para todo tipo de traballos», continúan.
Segundo os socialistas no que vai de mandato, Negreira cesou os xefes de servizo de Alcaldía, Educación, Museos Científicos, Xestión Tributaria, Emprego e Comercio e Xestión de Usos de Vía Pública; os xefes de Policía, Seguridade Cidadá; e a xefa de departamento de Servizos Sociais ademais de suprimir os postos de xefa de departamento de Rehabilitación e dun xefe de sección de Urbanismo.
Entre as persoas contratadas para estes postos destacan a actual xefa de servizo dos Museos Científicos e a xefa do servizo de Cultura, pois ambas as dúas están imputadas pola xuíza Pilar de Lara na operación Pokemon.
EFE.
