GowexO PP pediu hoxe a retirada da concesión dunha rede gratuíta sen fío do sistema wifi de acceso á internet en Ourense á compañía española Gowex, tras un escándalo sobre suposta contabilidade falsa.

Gowex, a multinacional española e provedora de wifi gratuíto en lugares públicos de 91 cidades, está acusada de falsificar as súas contas nos últimos catro anos, polo que foi declarada en suspensión de pagamentos.

Por este motivo, o grupo de Ourense presentou unha moción instando o Concello a “resolver a relación contractual coas empresas pertencentes ao grupo Gowex, adxudicatarias do servizo de wifi municipal”.

Ademais, convida a iniciar “un novo procedemento de contratación para que os usuarios non se sintan prexudicados ante a dúbida que pende deste servizo”.

O Concello adxudicara a xestión do servizo de wifi a “Iber wifi Exchange, SLU”, representada polo presidente de Gowex, Jenaro García, por un canon anual de 61.006 euros de acordo coa proposta da mesa de contratación, segundo o PP de Ourense.

Ademais, formalizara un contrato complementario de servizos a Gowex wireless, cun canon anual de 11.472,59 euros.

O PP advirte que o Concello de Ourense “non pode permitir o risco de que este servizo público estea asumido por unha empresa que recoñeceu prácticas manifestamente fraudulentas”.

Esta empresa recibira unha mención especial do xurado na categoría de traxectoria na segunda edición dos premios Crédito e Caución á Internacionalización.

En Ourense hai un total de 69 puntos activos de wifi e un total de 21.159 usuarios.

A proposta que valora o concello podería ter continuidade noutros concellos de España relativas a eliminar estas concesións, único activo do que dispón a citada compañía.EFE