O PP rexeita investigar Angrois no Parlamento e pide que non se ‘manipule’

Accidente de tren en AngroisO PP rexeitou outra vez máis a petición de que se investigue no Parlamento de Galicia o accidente de tren de 24 de xullo de 2013, petición formulada polo BNG, e o portavoz de Infraestruturas deste partido, Alejandro Gómez Alonso, pediu que non se «manipule» e «politice».

Na defensa da proposición non de lei, a nacionalista Ana Pontón considerou un «escándalo» e un grave «atropelo democrático» vetar a análise do que aconteceu co Alvia que cubría a ruta entre Madrid e Ferrol na curva da Grandeira, á altura do barrio compostelán de Angrois.

Hai unha débeda «moral e ética» e é «cruel» e «unha hipocrisía» que non se indague sobre iso, explicou Pontón, quen criticou a actitude obstrucionista dos altos cargos do xestor ferroviario Adif dependentes do Ministerio de Fomento.

«A mellor medalla que se lle pode dar ás vítimas é que se investigue a fondo, que se saiba a verdade e que se adopten as medidas necesarias» para que algo similar non volva pasar «nin en Galicia nin en ningún outro sitio», expresou, despois de aludir á concesión da Medalla de Ouro de Galicia ás vítimas e a quen participaron no auxilio tras o sinistro.

A parlamentaria da Alternativa Galega de Esquerda (AGE) Consuelo Martínez criticou o PP por se negar a investigar e advertiu do risco «doutro Angrois nun punto calquera da nosa rede ferroviaria», antes de avisar de que «tarde ou cedo van ter que responder» por isto.

O deputado socialista Raúl Fernández observou que «a sociedade espera conclusións para depurar responsabilidades, máis alá de recoñecementos públicos que nós apoiamos», e Gómez Alonso resaltou que o Parlamento non ten competencias para investigar este accidente.

«A rede ferroviaria é unha competencia do Estado e nin a Xunta nin ningún poder público galego poden intervir», afirmou, e rememorou que existe unha investigación xudicial que se encontra en fase de instrución e tamén o Comité de Investigación de Accidentes Ferroviarios (CIAF), dependente do Ministerio de Fomento, elaborou un informe.

No documento, determínanse a nivel técnico as causas desta traxedia e as circunstancias que levaron a ela, co obxecto de prevelas nun futuro e de formular as recomendacións oportunas para reducir os riscos.

A estas dúas vías súmase, engadiu, a Comisión de Estudo creada no Congreso dos Deputados para a análise do sistema ferroviario español.

Gómez Alonso criticou o que algúns dicían, de que oxalá membros do PP fosen neses vagóns, e cuestionou que iso sexa «democrático», ademais de lamentar que se fale de «puntos negros» no trazado ferroviario cando, asegurou, non os hai.

«Non alarmen os usuarios e non manipulen», pediu, perante o que Ana Pontón respondeu que ela non manipula ninguén e que se callar é no PP onde existen «técnicas de manipulación», así como un «rosario de mentiras» e unha ofensa mediática «á intelixencia», porque na investigación xudicial «non se depuran responsabilidades políticas». EFE