Campo Eólico

A compañía Gas Natural Fenosa anunciou onte a construción dun parque eólico en Cordal de Montouto, con 14 megawatts de potencia, que estará en funcionamento a finais deste ano, e que poñerá en marcha a primeira repotenciación dun parque eólico galego, en cabo Vilán, en canto teña autorización.

O parque eólico Cordal de Montouto (concellos de Aranga e Guitiriz) consta de seis turbinas que permitirán unha produción estimada de aproximadamente 37 GWh/ano, o que equivalería ao consumo eléctrico dunhas 10.000 vivendas.

Este parque iniciou xa as obras de construción, ao contar con todas as autorizacións necesarias, informa Gas Natural Fenosa nun comunicado.

No referente ao de cabo Vilán (Camariñas), a compañía enerxética modernizará e optimizará o parque eólico posto en marcha a principios dos anos 90, un dos primeiros construídos en Galicia e tamén pola compañía no mundo.

O proxecto consiste na instalación de dúas novas máquinas en substitución das 22 iniciais, cunha potencia para instalar de 6 megawatts, o que permitiría capturar as eficiencias tecnolóxicas e operativas desenvolvidas e sería a primeira que se realiza en Galicia.

Gas Natural Fenosa informou ademais de que revisou a súa carteira de desenvolvemento de proxectos eólicos en Galicia, que ascendía a 449 megawatts, incluídos os do Concurso Eólico de 2010, en que Fenosa Wind foi adxudicataria de 339 megawatts, o 14% do total en licitación.

Esta revisión prodúcese tras a aprobación do novo marco regulador que define a retribución da xeración eólica, que “desprazou o limiar de viabilidade económica desta clase de proxectos”, polo que seguirá desenvolvendo un total de 308 megawatts de potencia eólica ata 2020 en 11 parques.

“Con esta decisión, Gas Natural Fenosa reafirma o seu compromiso con Galicia e a súa aposta polo sector nunha das comunidades autónomas con mellor recurso eólico”, remarcou.

Doutro lado, segundo a normativa do Concurso Eólico de 2010, a compañía non continuará coa tramitación de 141 megawatts en 5 parques, ratificando ante a Xunta de Galicia o cumprimento das ratios de investimento e emprego do Plan Industrial asociado ao Concurso, de maneira proporcional á potencia que se mantén.

EFE.