Taller informativo para coñecer as novas opcións de financiamento europeo para proxectos culturais
O vindeiro 19 de xuño de 2015, a oficina de Europa Creativa – Cultura e o Punto Europeo de Cidadanía, en colaboración coa oficina de Europe Direct da Deputación da Coruña e a Secretaría Xeral de Cultura da Consellería de Cultura, Educación e Ordenación Universitaria, organizan no Museo de Belas Artes da Coruña o taller Proxectos Europeos dos Programas Europa Creativa – Cultura e Europa cos Cidadáns 2014 – 2020.
O obxectivo da iniciativa é ofrecer información práctica e resolver dúbidas específicas sobre o proceso de presentación de proxectos ás convocatorias dos programas Europa Creativa e Europa cos Cidadáns, que se abrirán no segundo semestre de 2015.
Dirixido a todos os perfís do sector cultural
Este taller está destinado a todos os perfís do sector cultural, empresas, organismos e entidades tanto públicas como privadas –administracións, fundacións, asociacións, empresas, ONG, consultoras e produtoras- que estean interesados en presentar un proxecto europeo no marco destes dous programas de financiamento.
Carolina Fenolle e Miguel Sánchez, técnicos da oficina Europa Creativa – Cultura e do Punto de Cidadanía, do Ministerio de Educación, Cultura e Deporte, serán os encargados de lles presentar aos asistentes aspectos prácticos e de interese sobre a convocatoria de proxectos de cooperación cultural europea, así como de irmandamento de cidades e redes de cidades.
A inscrición é gratuíta e deberá realizarse antes do vindeiro 17 de xuño de 2015. O número máximo de prazas é de 150, por rigorosa orde de inscrición, e entregarase un certificado de asistencia. O programa da xornada está accesible enwww.cultura.gal.
