Proxecto destinado á mellora da recollida selectiva de envases lixeiros en Folgoso do Courel

  • Acordo entre o Concello de Folgoso do Courel e Ecoembes para que 30 establecementos se sumen á recollida selectiva de envases lixeiros
  • Os locais do sector HORECA poderán formar parte da iniciativa desde este mes de outubro
  • A alcaldesa anima a restaurantes, bares, aloxamentos, casas rurais e outros establecementos turísticos a integrarse no proxecto

 

O Concello de Folgoso do Courel e ECOEMBES asinaron un acordo de colaboración para a posta en marcha dun proxecto destinado á mellora da recollida selectiva de envases lixeiros mediante o fomento da participación de establecementos do sector HORECA (Hostalería, Restauración e Cátering).

A iniciativa pretende que restaurantes, bares, aloxamentos, casas rurais e outros establecementos turísticos do Concello, preto de 30, poidan sumarse ao programa promovido por ECOEMBES e o Goberno local.

Máis contedores

O acordo traerá consigo o incremento, no seu caso, da dotación de contedores instalados na vía pública para a recollida selectiva de envases lixeiros adaptados a un uso compartido entre o cidadán e xeradores singulares do Concello de Folgoso do Courel.

Ademais, farase entrega aos establecementos participantes no proxecto de contedores de pequeno tamaño para a instalación no interior dos mesmos, ao tempo que serán informados e formados para asegurar a súa correcta participación na recollida.

 

Control e seguimento do proxecto

O Goberno local encargarase de promover a correcta utilización dos contedores por parte dos establecementos, mediante un procedemento de control e seguimento que garanta o seu correcto uso.

Tamén se compromete a garantir a prestación dun servizo de recollida selectiva de envases lixeiros de calidade, en particular no referente á frecuencia de recollida para evitar desbordamentos e á limpeza e mantemento dos contedores e da súa contorna de forma que se facilite e incentive a participación dos usuarios na recollida selectiva.

A alcaldesa, Lola Castro, anima a todos os establecementos a interesarse pola iniciativa e participar nela, o que suporá seguir tomando medidas para contribuír á mellora do medio ambiente.