Máis de corenta orixinais compiten na XXXIV edición do premio de novela «Blanco Amor»

Máis de corenta novelas veñen de presentarse á XXXIV edición do premio de novela longa «Eduardo Blanco-Amor». O premio, que organiza a Deputación de Ourense, está dotado con 12.000€ e amosa o compromiso da institución provincial coa difusión e posta en valor da figura de Blanco-Amor, o autor que inmortalizou Auria na súa obra.

«Ourense, Blanco Amor por Xosé Cid» de HombreDHojalata

«Ourense, Blanco Amor por Xosé Cid» de HombreDHojalata

 

No pasado ano 2014, cando se cumprían 35 anos do pasamento de Blanco-Amor, a Deputación asumiu o compromiso de exaltar a figura deste autor, un dos persoeiros clave non só da literatura galega senón universal, polo que, entre outras accións, decidiuse asumir a organización deste premio literario, e a creación dunha fundación co nome do escritor para a difusión e valorización da súa obra.

 

O premio de novela longa «Eduardo Blanco-Amor”, que se creou coma iniciativa do Concello de Redondela no ano 1981 e que, nesta ocasión, está organizado pola Deputación de Ourense, agasallará ao autor da obra premiada, ademais de coa cantidade de 12.000€, cunha obra que o escultor ourensán Acisclo Manzano preparou para este premio.

 

O xurado encargado de fallar o premio está composto polos escritores, Luis González Tosar e Bieito Iglesias, a profesora Malores Villanueva e os críticos literarios Armando Requeixo e Francisco Martínez Bouzas, e reunirase, tal e como sinalan as bases da convocatoria deste certame, o día 27 de novembro, data na que se fará público perante os medios de comunicación o veredicto do xurado.

 

A entrega do premio levarase a cabo nun acto literario que se celebrará o día 1 de decembro, data na que se cumpren 36 anos do pasamento do autor, no que será unha xornada «blancoamoriana» que comezará coa clásica ofrenda floral diante da campa de Blanco-Amor organizada polo centro Pen de Galicia, e culminará coa entrega do premio.

 

Por outra banda, cómpre sinalar tamén que a Deputación está a traballar na edición facsimiliar da «Antología Popular» do padre Feijoo, antoloxía feita por Blanco-Amor e editada no ano 1966 polo Centro Gallego de Buenos Aires.

También te podría gustar...