Aitor Rei, Manuel Baltar e Florencio de Arboiro

 

O presidente da Deputación de Ourense, Manuel Baltar, recibiu no Pazo Provincial ao escultor Florencio de Arboiro con quen analizou o que será o futuro “Museo da Roda de Afiar”, proxecto incluído no Plan 15-19 da Deputación de Ourense que ámbolos dous están a deseñar. O museo terá a súa ubicación na cidade de Ourense, coa finalidade de ofrecer a máxima accesibilidade para estudantes e público en xeral. O presidente do goberno provincial e o escultor falaron dun referente que pode servir de modelo como é o “Museo da Cuchillería”, de Albacete, “pois o obxectivo é facer un museo interactivo relacionado cos afiadores e todo o que leva consigo esta figura dende o punto de vista etnográfico, cultural e social para a provincia de Ourense”, afirma Manuel Baltar, quen engade que se está a traballar tamén “nunha unha unidade didáctica para amosar a historia dos afiadores e a súa xerga propia: o Barallete”.

Nesta mesma liña, o presidente provincial destacou que a película documental de Aitor Rei A última viaxe do afiador “terá un papel protagonista na promoción da figura do afiador”, e por iso a Deputación de Ourense colabora coa realización dun ciclo de cine de verán que proxectará entre os meses de xullo e setembro o filme en 15 concellos da provincia de Ourense, en concreto en Pereiro de Aguiar, Nogueira de Ramuín, Parada de Sil, Castro Caldelas, San Xoán de Río, Chandrexa de Queixa, Montederramo, Xunqueira de Espadanedo, A Teixeira, Esgos, Maceda, Paderne de Allariz, San Cibrao das Viñas, A Peroxa e Baños de Molgas.

Pola súa banda, Florencio de Arboiro agradeceulle ao presidente provincial a sensibilidade que amosa a Deputación de Ourense coa defensa e difusión das tradicións ourensás, e sinaladamente sobre o ámbito do afiador dixo que mantendo a súa memoria “tamén mantemos a memoria do noso pobo e conservamos as tradicións das nosas xentes”.