caminataDomingo 22 de Febreiro Camiñada cultural entre Pumares e O Barco polo Camiño de Inverno.Vai ser a segunda das camiñadas culturais para o coñecemento do patrimonio. Percorrerá os trece quilómetros que separan Pumares do Barco seguindo o Camiño de Inverno. Os participantes deberán estar ás 9 horas na praza de Pumares.

O roteiro partirá de Pumares, no concello de Carballeda de Valdeorras, ás 9 horas, para seguir pola marxe dereita do río Sil cara a aldea abandonada de Nogueiras, parando a ver os restos da ponte romana de A Pontóriga; en Sobradelo a Pontenova, impresionante obra do S.XVI con sete arcos, o principal foi dinamitado pola guerrilla do Abade de Casoio na Guerra da Independencia e logo reconstruido no século XX. Xa no término do Barco parada nos petróglifos e restos mineiros no lugar da Raia, en Éntoma, na súa ponte de un arco sobre o Galir, a igrexa de San Xoán Bautista que loce sobre un lateral a Cruz de Malta (sinalando a súa pertenza aos hospitalarios da Encomenda de Quiroga). Tamén en Éntoma visita aos restos de pequenas minas antigas nos Forroxancos antes de continuar cara O Barco seguindo o trazado do Camiño de Inverno, que se basea no do Camiño Real que, a súa vez, é unha vía romana secundaria de interese fundamentalmente mineiro que unía As Médulas coa mansión de San Salvador da Proba (O Barco). Á entrada do Barco parada no Parque Arqueolóxico da Cruz, outro enclave mineiro de época romana que sintetiza os fundamentos do sistema de explotación chamado ruina montium.

Este roteiro é de baixa dificultade, son aproximadamente 13,5 quilómetros. O acceso ao punto de partida (Pumares) é por medios propios, logo organizarase a volta para recoller os vehículos. Non é preciso inscribirse. A marcha estará guiada unha vez maís polo arqueólogo e historiador Santiago Ferrer Sierra. Para máis información poden chamar ao 988320053.

Facebook de Camiñadas Culturais de Valdeorras

Web do Concello do Barco