O DOG publica as ordes para as subvencións de proxectos de prevención de drogodependencias e condutas adictivas
O Diario Oficial de Galicia publica, na súa edición de hoxe, as dúas ordes polas que se aproban as bases reguladoras da concesión de subvencións en réxime de concorrencia competitiva para o cofinanciamento de proxectos de prevención de drogodependencias e condutas adictivas promovidas por concellos, agrupacións ou mancomunidades de concellos, así como por entidades privadas sen ánimo de lucro da Comunidade Autónoma de Galicia. Deste xeito procédese á súa convocatoria.
O obxectivo destas ordes é promover a adopción de estilos de vida saudables e de de ocupación do tempo libre entre os adolescentes e mozos galegos, ademais de potenciar, nos diversos colectivos nos que se intervén, factores de protección e reducir o impacto de determinados factores de risco asociados ao consumo de drogas. Tamén, que outros colectivos implicados na prevención, como familiares ou docentes, funcionen como axentes de saúde.
En total, o investimento previsto ascende a 2.701.352 euros, dos que 1.203.000 euros corresponden ás ONG e 1.498.352 euros son para os concellos. A partir de agora, as ordes pasan a ter un carácter bianual. Así, redúcese as cargas administrativas e increméntase a estabilidade dos equipos preventivos.
Ademais, introdúcese a posibilidade de que as entidades solicitantes incrementen a porcentaxe de cofinanciamento (o mínimo segue a ser 5%), fomentándose que as entidades locais integren a prevención na súa planificación estratéxica con carácter estable. Deste xeito enriquécese a valoración técnica dos proxectos presentados e foméntase o espírito de cofinanciamento das bases reguladoras.
Doutra banda, no caso dos concellos, engadíronse dos novos criterios de baremación (a porcentaxe de cofinanciamento e o custe medio por programa e 1.000 habitantes) e, no caso das ONG, un novo criterio (a porcentaxe de cofinanciamento).
En ambas dúas ordes, modificouse o cálculo das contías das subvencións para facelo máis sinxelo e simplificouse a documentación solicitada ás entidades beneficiarias, co obxecto de reducir a carga administrativa derivada da tramitación das subvencións.