• Manuel Baltar defende unha nova normativa que favoreza o financiamento local
  • O presidente da Deputación de Ourense participou onte na Xunta de Goberno da FEMP, que acordou solicitar ao Goberno leis que reforcen a autonomía municipal e garantan a concellos e provincias recursos suficientes para desenvolver as súas competencias

0 0 0 MB e Femp 29marzo16 (1)

 

O presidente da Deputación de Ourense, Manuel Baltar, participou onte en Madrid na reunión da Xunta de Goberno da Federación Española de Municipios e Provincias (FEMP) na que se acordou solicitar ao Goberno de España leis que reforcen a autonomía municipal e garantan a concellos e provincias os recursos suficientes para o desenvolvemento das súas competencias. Manuel Baltar defende unha nova normativa que favoreza o financiamento local, afirmando que as deputacións “son clave para a recuperación económica fronte á crise que afecta á sociedade e, sinaladamente, aos concellos”, subliñando que é necesario “incrementar a eficiencia destes gobernos locais intermedios e acometer unha reforma de competencias, de financiamento e do réxime electoral, que permita a elección directa dos deputados”, segundo declarou o presidente provincial ao remate da reunión.

Baltar considera que as deputacións deben ser “plataformas de servizos para os concellos e os cidadáns”, e sitúa aos servizos sociais, a xestión medioambiental e as infraestruturas como os tres piares fundamentais desa plataforma de xestión supramunicipal. Neste sentido Baltar entende que “modernidade, axilidade na xestión, aforro e eficacia”, son os elementos que deben presidir a xestión integral das deputacións, “cuxo papel no futuro considera clave para a pervivencia dos milleiros de pequenos e medianos concellos de España”, afirma, remarcando a importancia de desenvolver leis que avoguen por “unha administración, unha competencia e un financiamento”.

Na reunión de onte, a Xunta de Goberno da FEMP solicitou unha reunión co ministro de Facenda en funcións para modificar a regra que determina o teito de gasto, e pedirá que a devolución das liquidacións negativas da Participación das Entidades Locais nos Ingresos do Estado (PIE) poida aprazarse vinte anos, e que as achegas económicas das entidades locais a proxectos co-financiados pola UE non se tomen en consideración á hora de calcular o teito de gasto.