Anxo Queiruga, novo presidente de COCEMFE
- Anxo Queiruga, elixido presidente de COCEMFE, a entidade estatal que aglutina toda a discapacidade física e orgánica
- Durante a súa intervención, Anxo aludiu á unidade de todo o colectivo da discapacidade para facerse escoitar ante a Administración
- A eliminación do copagamento, o cambio da lei de propiedade horizontal, a actualización e mellora do catálogo orto-protésico, a investigación das enfermidades raras e o coidado dos pacientes crónicos, son algúns dos dereitos polos que iniciará a traballar o novo equipo
O presidente de COGAMI, Anxo Antón Queiruga Vila, vén de ser elixido como o máximo representante da discapacidade en España, tras gañar as eleccións a COCEMFE (Confederación Española de Personas con Discapacidad Física y Orgánica) que onte se celebraron en Madrid, en asemblea xeral extraordinaria.
A candidatura de Anxo Queiruga foi apoiada polo 69,6% das 89 entidades que votaron, un sufraxio no que tamén saíu nomeado o novo Consello Estatal da Entidade, que está composto por un equipo formado por oito persoas: presidencia, vicepresidencia e secretarías de organización, finanzas, formación e emprego, socio sanitaria, muller e igualdade e accesibilidade e vida independente.
Para estes catro anos de mandato que lle agardan, Anxo quixo iniciar a súa intervención facendo fincapé na importancia de manter a unidade de todo o movemento asociativo da discapacidade e das enfermidades crónicas, xa que, segundo dixo, “non haberá goberno que se resista ante un movemento asociativo unido, seremos dialogantes cos nosos gobernantes e tamén resistentes nas nosas reclamacións”.
Coincidindo coas vésperas das eleccións ao goberno español, o novo presidente de COCEMFE quixo recordar que nestas eleccións non todas as persoas poden exercer o dereito a voto porque “80.000 persoas con discapacidade están privadas de votar, por estar inxustamente incapacitadas moitas delas, e outras por falta de apoios”.
A axenda de inicio dos catro anos que lle esperan por diante está completa con temas de interese relevante para as máis de 3 millóns de persoas que representa COCEMFE, todas elas con discapacidade física e orgánica, temas como o copagamento porque, en palabras de Anxo “empobrece a milleiros de persoas necesitadas de apoios”. Outras accións importantes nas que van actuar son a discapacidade no rural, a pobreza, as mulleres, a vida independente, as enfermidades raras e os pacientes crónicos, a propiedade horizontal, o catálogo orto-protésico, a formación e o emprego e as persoas que dedican a súa vida ao coidado doutras.
Anxo representará, a través de COCEMFE a máis de 1.600 asociacións en todo o territorio español, que atenden a preto de 3 millóns de persoas usuarias, converténdoa na entidade máis representativa da discapacidade en España.
Anxo Queiruga, novo presidente de COCEMFE
Traxectoria de Anxo
Anxo Queiruga, natural de Porto do Son e afincado en Compostela dende hai 24 anos, inicia a súa primeira toma de contacto co movemento asociativo da discapacidade durante os anos 80 a través da asociación Ámbar da comarca barbanzá. A partir de aquí, inicia a traballar en COGAMI en 1997, primeiro na área de Administración e logo como coordinador da área de Formación e Emprego, postos que combina co cargo de Vicepresidente, ata que en 2007, é nomeado presidente de COGAMI e do Consello de Administración de Galega de Economía Social- GES (grupo de empresas de economía social que forman parte de COGAMI).
Que é COCEMFE?
COCEMFE é Confederación Española de Persoas con Discapacidade Física e Orgánica, unha organización non gobernamental, sen ánimo de lucro constituída en 1980 co fin de aglutinar, fortalecer, formar e coordinar esforzos e actividades das entidades que traballan a favor das persoas con discapacidade física e orgánica, a través da defensa dos seus dereitos e a mellora da calidade de vida.
Máis de 1.600 asociacións son as que conforman COCEMFE, divididas en Confederacións Autonómicas, Entidades Estatais e Federacións Provinciais que, á súa vez, aglutinan entidades locais. Para estas entidades, e ás persoas que representan, COCEMFE destina programas de integración laboral, educación, accesibilidade, atención sociosanitaria, lecer e atención tanto á infancia como ás mulleres e xuventude.
